पुणे : देशभरातील आणि परदेशातील चार अशा एकूण ७५ जादुगारांच्या जादूचा आविष्कार पुणेकरांनी अनुभवला. ज्येष्ठ जादूगार चंद्रशेखर चौधरी यांच्या पंच्याहत्तरीनिमित्त या ७५ जादुगारांच्या हस्ते त्यांचा सत्कार करण्यात आला.
सोसायटी ऑफ इंडियन मॅजिशियन्स या संस्थेने पीवायसी जिमखान्याच्या सहकार्याने चंद्रशेखर चौधरी यांचा सत्कार सोहळा आयोजित केला होता. पीवायसी जिमखाना येथे सोमवार, २१ ऑक्टोबर रोजी हा कार्यक्रम झाला. सोसायटी ऑफ इंडियन मॅजिशियन्सचे अध्यक्ष भूपेश दवे, पीवायसी क्लबचे अध्यक्ष डॉ. एस. जी. भाटे, सचिव आनंद परांजपे, विजय भावे यांच्यासह अभिनेत्री मृणाल कुलकर्णी आणि अनेक मान्यवर या वेळी उपस्थित होते. अभिनेत्री मृणाल कुलकर्णी यांनीही जादूच्या प्रयोगात सहभागी होऊन आनंद लुटला.
ऑस्ट्रेलिया येथील लिऑन्स, केरळचे कुमार कलातील, गोव्याचे प्रेमानंद, दिल्ली येथील रजत, दीपक पांडे, सतीश चोप्रा, हैदराबादचे अली आणि पुण्यातील जितेंद्र रघुवीर, सुरेश राजपूत या जादुगारांनी आपल्या जादूच्या प्रयोगांमधून अनेक करामती दाखवल्या.
या वेळी डॉ. एस. जी. भाटे म्हणाले, ‘चंद्रशेखर चौधरी यांनी वयाला मागे टाकले, ही जादूच आहे. जादूगार आपल्याला फसवत, हसवत मनोरंजन करतात. आपल्यातील लपलेल्या छोट्या मुलाला जागे करतात, ही मोठी गोष्ट आहे.’
चंद्रशेखर चौधरी यांनीही आपले मनोगत व्यक्त केले.